Во Јужна Африка започна ново меѓународно испитување за да се процени дали високите дози на антипаразитскиот лек нитазоксанид може да помогнат во лекувањето на пациентите со Ковид-19.
Истражувачите од Универзитетот во Ливерпул и Ливерпулската школа за тропска медицина (ЛСТМ) спроведуваат истражување како дел од револуционерната платформа за тестирање лекови за Ковид -19, наречена АГИЛЕ.
Нитазоксанид, клинички одобрен и достапен за производство, претходно покажа антивирусна активност против коронавирус, а истражувачите од Универзитетот во Ливерпул го идентификуваа како ветувачки кандидат за поширока употреба во повисоки дози.
Тимот што работи на истражувањето наведува дека нитазоксанид може да се администрира кај луѓе за лекување од коронавирус, но во дози повисоки од оние што во моментов се одобрени за третман на паразитски инфекции.
На учесниците ќе им се даваат 1.500 милиграми нитазоксанид двапати дневно во тек на седум дена и ќе бидат внимателно следени за да се потврди дека дозата тестирана кај здрави луѓе е безбедна и добро толерирана кај луѓе со благи симптоми на Ковид-19.
