Се пoбројни се реакциите на вчерашната изјава на британската министерка за надворешни работи Лиз Трус која порача дека руските сили треба да бидат протерани од цела Украина, пренесуваат агенциите во светот.
Поранешниот заменик командант на НАТО за Европа, генерал Ричард Ширеф, изјавил дека тоа е „апсолутно вистинскиот пристап“.
„Таквиот пристап треба да биде придружен со значителни ресурси. Ова треба да се направи правилно, преку Алијансата како целина“, изјавил Ширеф за Би-Би-Си.
Генералот Ширеф предупредил дека рускиот претседател Владимир Путин на тоа би можел да одговори со агресија, но посочил дека ескалацијата е неопходна за да се покаже дека Западот е сериозен.
„Војната со Русија е најлошото сценарио, но подготвувањето за најлошото сценарио веројатно би можело да го одврати Путин, бидејќи на крајот Путин ја почитува само силата“, заклучил генералот.