Претседателот Стево Пендаровски, по повод големиот христијански празник – Божик, упати честитка до сите верници кои го прославуваат Божик според Грегоријанскиот календар.
„Празникот на Христовото Раѓање секогаш асоцира на време поминато во прегратка на најблиските, среде топлината на нашите домови. Да ја испочитуваме традицијата и годинава да прославуваме во рамките на најтесното семејство, да избегнуваме движења, собирања и да придонесеме со своето одговорно однесување за запирање на ширењето на пандемијата на Ковид-19“, порача македонскиот претседател.
Тој воедно изрази надеж дека овој празник и неговото значење ќе бидат духовна поткрепа за надминување на кризата и за конечно враќање на нормалното секојдневие.
„Се надевам дека ќе успееме да ја зачуваме енергијата и светлината на божиќните празници преку целата година, останувајќи грижливи, солидарни и хумани, постојано имајќи добра мисла и дарувајќи љубов“, порача Пендаровски.
