Берово, 5 март 2020 (МИА) – Со средства во износ од 1,2 милиони денари ќе се реконструира кровот во подрачното училиште „Дедо Иљо Малешевски“ во село Митрашинци. Во училиштето, како што информираат од Општината, ќе биде заменета старата дотраена кровна конструкција.
-Инвестирањето во образованието е вложување во иднината и клучен фактор за развој на општина Берово. Затоа согласно претходно подготвен проект, ќе биде поставена нова кровна конструкција во подрачното училиште во Митрашинци, со што сметаме дека ќе се подобрат условите за учење на учениците, а воедно ќе се заштити и самата зграда, информираат од општина Берово.
Реализацијата на овие активности, како што додадоа се поддржани преку Програмата за енергетска ефикасност на Општина Берово, како и Програмата на Владата, за намалување на аерозагадувањето за 2020 година.
Во насока на создавање подобри услови за одвивање на воспитно образовниот процес како што дополнија, минатата година, во подрачното училиште во село Митрашинци, беа оградени спортските терени. вс/скс/
