Скопје, 22 март 2020 (МИА) – Општина Гази Баба во рамки на акциите за одржување на хигиената на јавните површини, денеска стави акцент на спортските зони и верските објекти. Дезинфицирани се и исчистени сите детски и спортски игралишта, фитнес зоната во парк шумата Гази Баба, како и урбаната опрема на детското игралиште во ООУ „Григор Прличев”, и црквите и џамиите кои се на територија на општина Гази Баба.
Од Општина Гази Баба информираат дека мерки се преземаат и во сите месни и урбани заедници, пензионерскиот дом во Автокоманда, а започнале и со машинско чистење со мала и голема механизација обезбедена со помош на приватни компании кои ја ставиле на располагање за потребите на општината.
– Досега опфативме во Железара, Автокоманда и Ќерамидница мали сервисни улици, а од Трубарево до Дрма со голема механизација се чистеа и главните и сервисните улици. Извршивме и дезинфекција во просториите на Домот на културата “Димитар Влахов” во Автокоманда, библиотеката “Браќа Миладиновци” и објектот на УЗ Автокоманда, стои во соопштението од Општината.
Домот на културата „Димитар Влахов” согласно препораките во овој период, подвлекуваат, е затворен и одложени се сите активности, a eкипи на ЈКП Гази Баба ќе извршат повторно дезинфицирање на објектот пред неговото повторно отворање.
Од општинското јавно комунално претпријатие извршиле и рачно чистење и на плочникот пред кино Маџари, целосна дезинфекција на урбаната опрема на овој јавен простор, а извршиле и целосна дезинфекција на Сточниот пазар кој е времено затворен поради состојбата со корона вирусот.
Од Општина Гази Баба најавија дека и наредните денови ќе продолжат со одржување на чистотата во општината, следејќи ги препораките на Министерството за здравство и на Владата, со цел да се заштитат граѓаните и да се спречи ширење на коронавирусот преку јавните површини. цр/мч
