Од сабота бесплатна контрацепција во Франција ќе може да добијат млади жени на возраст од 18 до 25 години, кои од финансиски причини сѐ помалку користат контрацепција, а се проценува дека ги има речиси три милиони.
Францускиот министер за здравство, Оливие Веран, ја објави мерката уште во септември истакнувајќи дека сѐ повеќе млади жени се откажуваат од контрацепција од финансиски причини.
Луиз Делавие, портпаролка на француското феминистичко здружение En avant tous, рече: „Младите жени на возраст меѓу 18 и 25 се многу ранливи бидејќи губат многу права во споредба со времето кога биле малолетни и се во прилично лоша економска ситуација“, изјави таа за АФП.
Според Министерството за здравство, младите жени ќе добијат една бесплатна консултација со лекар или акушерка, лекарски преглед и средства за заштита од бременост, без разлика дали се работи за контрацептивни таблети, спирала, дијафрагми или итна хормонална контрацепција.
