Од полноќ, во Австрија стапија на сила нови поостри мерки за борба против ширењето на коронавирусот, што воведе многу ограничувања на бројот на луѓе на собири, како и продолжување на обврската за носење заштитни маски.
Во уредбата на Министерството за здравство се наведува дека при влегување на јавен простор на затворено и во подземни премини, мора да се носи маска. Истото важи и за собири и манифестации, без разлика дали се на затворено или надвор.
Уредбата исто така нагласува дека при влегување на јавни места на отворено, мора да се одржува растојание од најмалку еден метар кон лица кои не живеат во исто домаќинство.
Во авионите, како и јавниот превоз, во исклучителни случаи, растојанието од еден метар може да се наруши, но маската е задолжителна.
Указот ја воведе обврската да се носат маски во метро станиците, железничките станици, трамвајските станици и аеродромите.
Оној кој се повикува на здравствени причини за време на контролата, поради што не може да носи маска, ќе мора да има потврда од лекар кој има дозвола за работа во Австрија.
Во рестораните, максималниот број на луѓе на една маса е ограничен на шест лица во затворени простории и 12 лица на отворено.
Доколку угостителскиот објект има на располагање повеќе од 50 места, од 1 ноември ќе мора да има концепт на превенција, а исто така ќе мора да има и „ковид одговорно лице“.
Што се однесува до настаните и спортските натпревари, уредбата значително го намали бројот на луѓе.
Така, максимум шест лица со шест малолетни деца можат да присуствуваат на собир во затворени простории без места за седење, а на отворено 12 лица и шест малолетни деца.
На собири каде има места за седење во затворен простор, дозволен е максимален број од 1.000 лица, а на отворено до 1.500 лица.
Уредбата регулира и проби, настапи од хорови и музички оркестри – за аматери, само шест лица ќе можат да настапуваат заедно во затворено, а 12 на отворено. Концептот на превенција е обврзувачки за професионалните музичари, а ако бројот на учесници надмине 50 во затворено и 100 на отворено, потребно е „ковид одговорно лице“.
Со указот се утврдуваат и заштитните маски во домовите за стари лица, во кои обврската се однесува на сите посетители и вработени. Исто така, овие домови мора да развијат концепт на превенција со цел да се минимизира ризикот од зараза, а правилата за посета ќе бидат наведени во тој концепт.
Новата регулатива вклучува и забрана за носење визири, која ќе стапи на сила на 7 ноември.
