Делчево, 6 мај 2020 (МИА) – Пред дворовите во трите цркви кои го носат името „Св.Ѓорѓи“ во делчевско, денеска православните христијани го одбележуваат празникот Ѓурѓовден. Со цел заштита на населението од Ковид-19, одбележувањето се одвива со почитување на препораките на Министерството за здравство.
– Во делчевско три цркви го носат името на „Св.Ѓорѓи“. Тоа се црквите во село Град, малата црква (манастир) во село Вирче и црквата во село Киселица. На оние места каде се служи црковен ручек церемонијата се одвива со почитување на препораките на надлежните. Ручекот се поделува на граѓаните и заради избегнување гужви се носи дома. На тој начин сметаме дека целосно ќе се заштити населението од несакани ситуации, велат делчевските свештеници.
За прв пат денеска се организира празнична свеченост и кај местото „Скокот“, во село Габрово каде се врши осветување на извор за чија вода се смета дека е лековита.
– Иницијативата е на неколку наши соселани кои направија убава чешма за да може да се користи водата. За луѓето денеска е обезбеден ручек кој поради одбегнување поголеми собирања им се дава на присутните и се носи дома. Да се надеваме дека оваа света вода во иднина ќе биде посетувана од голем број граѓани, велат мештани од село Габрово.
Пијанец е познат како крај во кој редовно се почитува ваквата традиција за поголемите празници, чии масовни собири поради присуството на Ковид-19 во најголем дел беа одложени. вс/мс/
