Претседателот на ВМРО-ДПМНЕ, Христијан Мицкоски заедно со Стефан Андоновски член на Извршниот комитет на ВМРО-ДПМНЕ, денеска остварија средба со новиот директор на Меѓународниот Републикански Институт (ИРИ) за Република Македонија, Крис Бренан.
Мицкоски му посакал добредојде на директорот Бренан со надеж дека и во иднина ќе продолжи и ќе се интензивира досегашната соработка помеѓу ВМРО-ДПМНЕ и ИРИ.
„На средбата се разговараше за актуелната политичка и економска состојба во државата, како и потребата од одржување на брзи предвремени парламентарни избори.
Од страна на Мицкоски беше укажано дека државата се соочува со економска, енергетска и здравствена криза, а поради слабиот капацитет на власта на СДСМ и Димитар Ковачевски кој нема легитимитет од страна на граѓаните, потенцијална е и политичка криза која негативно ќе влијае врз граѓаните, но и врз државата“, се наведува во партиското соопштение за средбата.
Мицкоски порачал дека е потребно одржување на предвремени парламентарни избори со цел граѓаните да можат да одлучат за својата иднина и промените кои се неопходни на секое поле.
Соговорниците, воедно, се согласиле на понатамошна соработка и продлабочување на односите.
