Ширењето на мајмунските сипаници во САД би можело да биде почеток на нова сексуално пренослива болест, пишуваат американските медиуми.
Некои експерти стравуваат дека мајмунските сипаници ќе станат толку широко распространети што би можеле да станат сексуално преносливи болести како херпес, гонореја и ХИВ. Од друга страна, постојат тврдења дека ширењето на болеста на почетокот би можело да се ограничи.
Никој не е сигурен дали ширењето на епидемијата можело да се спречи, но некои веруваат дека вакцините и тестирањата сепак можат да помогнат. Досега, повеќе од 2.400 случаи се пријавени во САД како дел од меѓународната епидемија што се појави пред два месеци.
Здравствените власти не се сигурни колку брзо се проширил вирусот. Тие имаат само ограничени информации за луѓето на кои им е дијагностицирана болеста и не знаат колку заразени луѓе несвесно ја шират. Тие исто така не знаат колку добро функционираат вакцините и третманите.
Покрај тоа, здравствените власти во САД немаат овластување да собираат и поврзуваат податоци за тоа кој е заразен и кој е вакциниран. Со толку големи прашања, предвидувањата за тоа колку голема ќе биде епидемијата во САД ова лето варираат – се вели дека бројките може да бидат и до 13.000, но дури и 10 пати повеќе од таа бројка.