Кај една мачка во Велика Британија е потврдена зараза со коронавирус. Управителката на ветеринарната служба, Кристин Мидлемис, изјави дека станува збор за редок случај во кој мачка е заразена со коронавирус.
Мачката била заразена од нејзините сопственици, кои биле позитивни на тестот. Во меѓувреме сите оздравеле, дури и мачката, пишува „Индипендент“.
Британскиот институт за јавно здравје препорачува граѓаните да ги мијат рацете редовно, пред и по контакт со животни.
Во сите случаи на заразени животни досега симптомите биле благи, а домашните миленици оздравеле за неколку дена. Научниците веруваат дека луѓето можат да заразат животни со вирусот, но не и обратно, бидејќи нема докази за пренесување на вирусот од животни на луѓето.
