Дедо Мраз ќе носи маска и ќе може да патува низ целиот свет со дозвола за движење, напиша на социјалните мрежи италијанскиот премиер Џузепе Конте во порака до децата загрижени за тоа како ќе се одвиваат новогодишните празници.
„Дедо Мраз ми гарантираше дека веќе има потврда за меѓународно патување. Може да патува насекаде и да им носи подароци на сите деца ширум светот”, напиша Конте како одговор на прашањето на петгодишниот Томас.
Конте понатаму раскажува дека Дедо Мраз порачал да се носи маска и да се држи физичко растојание за да се заштитиме себе си и лицата со кои се среќаваме.
Италијанскиот премиер го повика малото момче да стави шише со дезинфекциски гел под елката, покрај топлото млеко и бисквитите.
„Му кажав на Дедо Мраз дека си бил добар, не мора да му го пишуваш тоа. Исто така, дознав дека од Дедо Мраз бараш да го избрка коронавирусот. Не заборавај да побараш од него и друг подарок“, пишува Конте.
Италија, која беше најтешко погодена во Европа во првиот бран на коронавирус, веќе неколку недели се соочува со силен втор бран на епидемијата, а неодамна го премина и прагот на еден милион заразени.
Воведени се ограничувачки мерки во таа земја, но лекарите и политичарите бараат поригорозни мерки, вклучително и карантин.
