Австриската авиокомпанија АУА нема да може да превезува патници до Кина две недели, а причината за тоа е што на еден лет се пронајдени патници заразени со коронавирус.
Кинеските здравствени власти издадоа забрана за превоз на патници во авиони на АУА две недели, откако на 5 март беа откриени пет патници заразени со коронавирусот на летот од Виена до Шангај. По истекот на привремената забрана, доколку се повтори превозот на заразени патници, се заканува подолга забрана за слетување.
Кина бара од авиокомпаниите да спроведат сеопфатни тестови пред патувањето, но исто така ги тестираат патниците по слетувањето. Тоа значи дека патниците што летаат директно од Австрија мора да имаат негативен ПЦР-тест и еден негативен антиген тест, не постар од 48 часа. Резултатите од тестот мора да бидат потврдени од кинеската амбасада.
Петте заразени патници, како што објави АУА, се транзитни патници, кои пристигнале во Виена од разни дестинации и кои морале да носат маски ФФП2 за време на целиот престој на аеродромот и во авионот.
Забраната за превоз на патници до Кина стапува на сила од денес, па следниот редовен лет за Шангај оваа компанија ќе го изврши дури на 9 април.
