Цирих, 12 април 2020 (МИА) – Претседателот на ФИФА, Џани Инфантино изјави дека би било „неодговорно“ да се обнови фудбалската сезона сè додека постои дури и најмал ризик по животот или здравјето на играчите.
Првенството и турнирите ширум светот се прекинати скоро еден месец поради пандемијата од коронавирус, но во многу земји опциите за рестартирање на кампањите веќе се разгледуваат.
Инфантино ги повика раководствата на индивидуалните првенства да ги почитуваат препораките на здравствените власти и да не брзаат.
Во германската Бундеслига размислуваат да ја обноват сезоната на почетокот на мај, иако со затворени врати, а во англиската Премиер лига размислуваат повторно да играат на почетокот на јуни.
– Нашиот врвен приоритет, принцип што го почитуваме и се стремиме да го следиме на сите турнири под наше покровителство е дека здравјето доаѓа во прв план. Ова е најважното нешто. Нема меч, натпреварување, првенство што вреди, ако е во ризик дури и еден човечки живот. Секој треба јасно да го разбере тоа. Ќе биде повеќе од неодговорно ако побрзаме со обновување на сезоната ако работите не се 100 проценти безбедни. Подобро е да почекаме отколку да ризикуваме, рече Инфантино.
