Рим, 14 април 2020 (МИА) – Напаѓачот на Лацио, Чиро Имобиле изјави дека во римскиот гигант се уште сонуваат за титулата во Серија „А“. „Лацијалите“ се на второто место во пласманот во Калчото, веднаш зад шампионот Јувентус.
Италијанската Серија „А“ беше суспендирана на 8 март, откако Апенините беа сериозно погодени од пандемијата од коронавирус. Според Имобиле, ќе биде тешко за Лацио да го задржи моментумот што го стекна пред да запре шампионатот.
– Нашите амбиции остануваат исти. Очигледно, не размислувавме многу за фудбалот во последно време. Мораме да се подготвиме ментално. Имаме уште 12 дуели на кои треба да сонуваме. Тоа е како да започнете ново првенство. Ќе биде тешко, но ќе се обидеме да им ги вратиме насмевките на нашите навивачи, изјави стрелецот за „Скај Италија“.
Имобиле, исто така, имаше за цел рекордот на Гонзало Игуаин за сезоната 2015-16, кога Аргентинецот постигна 36 гола во кампањата во Серија „А“.
– Јас тренирам напорно затоа што сакам да го подобрам неговото достигнување. Би било одлично. Ќе видиме каква ќе биде состојбата по оваа пауза. Ќе дадам се од себе, додаде Чиро Имобиле, кој во моментов има 27 голови на 26 натпревари оваа сезона.
