Илјадници луѓе протестираа денеска во неколку градови низ Франција поради здравствените ковид-дозволи, кои сега се задолжителни за пристап до ресторани и кафулиња, културни и спортски настани и патувања.
Демонстрантите велат дека новите мерки се закана за нивните слободи.
Во Париз, четири групи организираа четири различни протести, а над 200 митинзи се одржаа во други француски градови, додека повеќе од 200.000 луѓе излегоа на улиците минатата недела, пренесува АП.
И покрај протестите, анкетите покажаа дека повеќето Французи поддржуваат здравствени дозволи, а милиони луѓе ја примиле првата доза на вакцина, откако францускиот претседател Емануел Макрон ја објави мерката на 12 јули.
Од минатиот месец, Франција регистрираше голем број инфекции, околу 22.000 дневно, а над 47 милиони луѓе во земјата, или 70,2 проценти од населението, примиле барем една доза од вакцината, додека повеќе од 40,5 милиони, или 60,5 проценти, се целосно вакцинирани.
