Министерот за здравство Венко Филипче присуствуваше на видео конференција на тема „Ковид-19 во земјите од Западен Балкан, Грција и Бугарија“.
На видео конференцијата која ја иницираше Филипче, учесниците информирале за состојбата со коронавирусот во своите земји, предизвиците со почетокот на учебната година, подготовките на системот за наесен и процесот за набавка на вакцината.
Во однос на границите и слободното движење на патници во земјите од регионот, македонскиот министер посочил дека треба да се заземе координиран пристап помеѓу земјите, како границите да бидат отворени и да им се олесни преминот на патниците, а притоа да се обезбеди контрола над ситуацијата со коронавирусот, на што се сложиле и останатите учесници на конференцијата.
Филипче исто така нагласил дека Македонија е заинтересирана за набавка на вакцина и дека, освен што е дел од Ковакс програмата на СЗО, земјата добила понуда од полскиот амбасадор да купи количина од Полска од вакцината на „Астра Зенека“.
Врз основа на кажаното, на состанокот е договорено да се изработи иницијален документ на взаемен протокол за границите. На документот ќе работи работна група составена од членови од сите земји на Западен Балкан, Грција и Бугарија, а следната видео конференција на која ќе се дискутира за протоколот ќе се одржи, најдоцна, за две недели.
На денештната конференција учество земаа министрите за здравство на Албанија, Огерта Манастарлиу; на Грција, Василеиос Кикилиас; на Република Српска, Ален Шераниќ и на Косово, Арменд Земај, како и заменик министерот за здравство на Босна и Херцеговина, Горан Черкез, Данијела Урошевиќ, Асистент на министер за интернационална соработка и европски интеграции и Верица Јовановиќ директор на Институтот за јавно здравје од Србија, како и Ангел Кунчев од Бугарија– директор на здравствениот иснпекторат.
