Билатералниот Договор за слободна трговија меѓу Северна Македонија и Турција, склучен пред 20 години, ќе се модернизира и надградува. Тоа е договорено во Анкара на денешната средба меѓу министерот за економија Крешник Бектеши и Рухсар Пекчан, министерката за трговија на Република Турција, на кој ревидирањето на Договорот за слободна трговија било главна тема, соопшти Министерството за економија.
Бектеши изјавил дека експерти веќе работат околу либерализација на земјоделско-прехранбениот сектор, усогласување на тарифните производи според најновиот хармонизиран систем за примена, реципрочна либерализација на трговијата со услуги и регулирање на новите правилата за потекло.
„Резултатите од работата на експертите, ние, двајцата министри ќе ги верификуваме во рамки на Мешовитиот Комитет, задолжен да се грижи за имплементација на Договорот за слободна трговија“, кажа Бектеши.
Според него, Турција во разни сектори е наш стратешки инвестициски партнер, а можат да се очекуваат инвестиции во производството на автомобилски компоненти, информатичко-комуникациската технологија, земјоделството и преработка на храна, фармацевтската индустрија, енергетиката и ОИЕ и друго.
Статистичките податоци покажуваа дека Турција во последните три години е на 8. место на листата на земји со кои РСМ остварува трговска размена. Во 11-те месеци во 2020 година, вкупната трговска размена е 477,3 милиони долари, од кои извозот од РСМ 85 милиони долари, а увозот од Турција изнесува 392,3 милиони долари.
![Увозот на електрични автомобили во последните четири години во земјава рамен на статистичка грешка [инфографик]](https://utrinskivesnik.mk/wp-content/uploads/2021/02/Увозот-на-електрични-автомобили-во-последните-четири-години-во-земјава-60x40.jpg){kind=small}