Унгарскиот парламент денеска ја избра Каталин Новак од владејачката партија Фидес за нов шеф на државата, со што стана првата жена избрана на таа функција во историјата на Унгарија.
Новак (44) досега ја извршуваше функцијата министер без ресор задолжен за семејни прашања. Таа ќе ја преземе функцијата од актуелниот претседател Јанош Адер, на кој му завршува вториот претседателски мандат.
Новак освои 137 гласа, врз основа на резултатите објавени на веб-страницата на парламентот, додека кандидатот на опозицијата Петер Рона доби 51 глас.
Во говорот пред гласањето, Новак рече дека ќе го брани уставот подготвен и одобрен од Фидес, кој, според Ројтерс, само ги зајакна клучните точки од конзервативната агенда на Орбан.
