Најавата на рускиот гигант Газпром дека дополнително ќе ја намали испораката на гас во Европа оваа недела е политички мотивирана, изјави шефицата на енергетската политика на Европската унија, Кадри Симсон.
Таа ги оспори наводите на рускиот гасен холдинг дека поради редовно одржување мора да ја прекине работата на друга турбина на гасоводот Северни Ток 1, со што ќе се намали протокот на гас преку тој гасовод до Германија.
„ Знаеме дека нема техничка причина за тоа. Ова е политички мотивиран чекор и мора да бидеме подготвени за тоа. Токму поради оваа причина, превентивното намалување на нашата потрошувачка на гас е мудра стратегија“ изјави Симсон по пристигнувањето на состанокот на министрите за енергетика на земјите од ЕУ во Брисел.
Таа додаде дека очекува министрите да постигнат договор за вонредните правила на ЕУ кои бараат од земјите да ја ограничат својата побарувачка за гас.
Газпром наеднаш, без претходна најава, го зголеми притисокот во гасоводот што испорачува руски гас во Европа, соопшти денеска украинскиот државен гасовод.
Како што предупреди украинската компанија, ваквото зголемување на притисокот може да предизвика итни ситуации, вклучително и пукање на гасоводи, а операторите на гасоводот се обврзани да се известат однапред.