Европската Унија започна операција за складирање залихи за да ја зајакне својата одбрана од хемиски, нуклеарни и биолошки инциденти поради загриженоста за конфликтот во Украина, објавил Ројтерс, повикувајќи се на официјални записи и документи на ЕУ и извори запознаени со ситуацијата.
Медиумите пишуваат дека се очекува процесот да трае со недели, можеби и месеци и дека ќе ги прошири резервите на располагање на населението на ЕУ и партнерските земји, вклучително и Украина.
Залихите ќе вклучуваат опрема за деконтаминација, ракавици, маски и други материјали за хемиска, биолошка, радиолошка и нуклеарна одбрана, изјавиле за Ројтерс две лица запознаени со ова прашање.
Овој потег уследи откако ЕУ беше загрижена за нуклеарните инциденти во Украина, според документите објавени од Ројтерс.
„Нуклеарните локации се управувани од високо обучен и квалификуван персонал, што е тешко во сегашната конфликтна ситуација, особено кога тие се преземени од воени сили“, кажале претставници на ЕУ, пренесуваат медиумите.
Руските трупи ја презедоа нуклеарната централа Запорожје, најголемата во Украина, во раната фаза на инвазијата.
