Црногорскиот министер за економски развој,Јаков Милатовиќ, соопшти дека програмата за економско државјанство нема да биде продолжена. Причината за тоа е фактот што не е поддржана од Европската Унија.
„Оваа програма може да го забави процесот на пристапување на Црна Гора во Европската Унија“, рече Милатовиќ во парламентот, додавајќи дека неговото министерство нема список на лица на кои им е дадено економско државјанство, објави црногорскиот јавен сервис РТЦГ.
Претходно, пратеникот од Демократскиот фронт, Дејан Ѓуровиќ побара од владата да ги објави имињата на 67 граѓани кои добиле економско државјанство.
„Кои се почесните граѓани кои го добија пасошот и како го заслужија тоа?“, праша Ѓуровиќ на седницата на собранието.
Милатовиќ одговори дека работите за економско државјанство се во надлежност на Министерството за внатрешни работи и дека тој нема список со оние на кои им е доделен.
