Министрите за надворешни работи на ЕУ разговараа во Брисел за можноста за воведување санкции врз десетици белоруски претставници, вклучувајќи го и претседателот Александар Лукашенко.
Кандидатот на опозицијата на спорните претседателски избори, Светлана Тихановскаја, ги повика шефовите на дипломатиите на ЕУ да покажат поголема храброст.
ЕУ состави список од околу 40 лица на кои може да им го замрзне имотот и да воведе забрана за патување поради нерегуларности на изборите на 9 август на кои Лукашенко го освои шестиот мандат, како и остриот одговор на властите на протестите што следуваа, а главно прашање е дали треба да се воведат санкции и за Лукашенко, пренесува АП.
За да се донесе одлука за санкции потребен е консензус на сите 27 членки на ЕУ.
Пред состанокот во Брисел, министрите за надворешни работи на ЕУ разговараа со Тихановскаја, која е во егзил во Литванија по бегството од Белорусија.
Таа изјави дека побарала од министрите да повикаат нови избори и дека ги повикала да не испраќаат финансиска помош на режимот затоа што таа ќе биде употребена за насилство, за убиство на белорускиот народ.
„Во оваа ситуација многу постигнавме сами, само со силата на белорускиот народ, но сега сфаќам дека ни треба помош однадвор“, рече Тихановскаја.
Таа додаде дека „санкциите се многу важни во нашата борба“, со цел да се изврши притисок врз владата.
„Разбирам дека некои земји се двоумат кога станува збор за воведување санкции, но ги замолив да бидат похрабри“, рече таа.
