Четворица рудари загинаа во експлозија во рудник за јаглен во јужна Полска, а спасувачите се уште се обидуваат да стигнат до шестемина заробени рудари кои останаа под земја, изјави денеска сопственикот на рудникот, ЈСВ.
Компанијата ЈСВ, која стопанисува со рудникот, вчера соопшти дека во рудникот Бориња-Зофјовка има 52 рудари, дека 42 од нив успеале сами да го напуштат, а спасувачките екипи трагаат по 10 исчезнати рудари.
Претходно денеска, компанијата ЈСВ преку соопштение наведе дека по многу часови спасувачите доцна во саботата стигнале до четворица рудари, но дека тие не дале знаци на живот.
– Условите ни дозволуваат да ја продолжиме потрагата по нашите шест колеги – изјави за новинарите извршниот директор на ЈСВ, Томас Кудни.
Ова е втора несреќа за една недела во рудник за јаглен во сопственост на ЈСВ.
Минатата среда пет лица загинаа, а седум останаа заробени во рудникот за јаглен Пњовјек во јужна Полска по експлозијата, потсетува Ројтерс.
