Ресен, 19 февруари 2020 (МИА) – Општина Ресен утврди ативности и мерки за едукација и подигнување на јавната свест со цел подобрување на еколошката и животната средина во општината.
Во текот на годината, локалната самоуправа ќе го мотивира населението на соработка со локалната самоуправа заради заштита и унапредување на квалитетот на животот, едукација и подигнување на свеста за чиста животна средина.
-Посебен фокус е нашето залагање за примена на обновливи извори на енергија, едукација и организирање на активности за подобрување на енергетската ефикасност и ќе организираме активности за ограничено користење на пестициди и ѓубрива со цел заштита и обнова на почвата, посочуваат од Општина Ресен.
Според утврдената програма за заштита на животната средина и природата, на подрачјето на Општина Ресен во наредниот период ќе се организираат кампања од областа на животната средина, промоција на природните вредности кои даваат белег на општината и ќе се поттикнуваат институциите за проектни апликации од областа на екологијата.
-Како и досега, така и во иднина ќе нудиме поддршка на проектите кои доаѓаат од здруженијата на граѓани, а се насочени кон зголемување на јавната свест и едукација на локалното население. Јавните трибини и дебати, се составен сегмент на општинската програма, посочуваат од тамошната локална самоуправа.
Општина Ресен во текот на годината програмски ќе ги одбележи сите поважни денови од т.н. еко-календар, односно Ден на планетата Земја, Ден за заштита на водите, Ден на екологијата, Ден без автомобили, Ден на Мочуриштата, а ќе организира трки со велосипеди и ролери. мт/сст/
