По барање на претседателот на Европскиот парламент (ЕП), Давид Сасоли, правната служба на парламентот денеска во Судот на правдата поднесе тужба против Европската комисија поради тоа што не се спроведува механизмот за санкции против земји членки што ги кршат правилата, пишува на веб-страницата на Собранието.
Станува збор за регулатива, којашто беше усвоена во декември минатата година, ѝ дозволува на ЕУ да го запре финансирањето на земјите членки за кои Брисел смета дека му пркосат на владеењето на правото. Сепак, Комисијата досега се воздржуваше од нејзино користење.
„Како што беше побарано во собраниските резолуции, нашата правна служба денеска поднесе тужба против Европската комисија за непримена на регулативата. Очекуваме Европската комисија да дејствува на доследен начин и да го исполни она што го рече претседателката Фон дер Лајен за време на нашата последна пленарна дискусија на оваа тема. Зборовите мора да се претворат во дела“, рече претседателот Сасоли.
Нацијата што во моментов е на врвот на црната листа е Полска, чија конзервативна влада усвои голем број политики што ЕУ ги смета за спорни.
