Демократската унија за интеграција оценува дека денешната прес-конференција на претседателот на Алијансата за Албанците, Зијадин Села, е јавен притисок врз целиот правосуден систем и вработените во овој сектор.
Од владејачката партија велат дека денешното појавување пред медиумите е скандалозно, неприфатливо, досега невидено и претставува грубо и директно мешање во правосудниот систем и независноста на судството.
„Суровото мешање во судовите и обвинителството зборува за менталитетот на сојузникот на Левица и Апасиев и го открива вистинското лице на една нереформирана структура. Поделбата на власта во државата функционира како уставно начело и исто продолжува да функционира професионално, сите кои го прекршуваат законот одговараат пред правосудниот систем и сите последни и отворени предмети јасно покажуваат дека во земјата функционира законот кој е еднаков за сите и никој не е недопирлив пред него“, велат од ДУИ.
Демократската унија за интеграција додава дека е единствената партија која го иницираше ветингот во сите нивоа на власт, вклучително и во правосудниот систем, за да има чисти и достоинствени личности кои ќе си ја вршат работата на најдобар можен начин.
