Демократската унија за интеграција (ДУИ) денеска реагира на ставовите изнесени од ВМРО-ДПМНЕ, според кои, Ахмети кога сака да им се допадне на странците, се откажува од Косово, а кога со СДСМ, како што се вели, краде на тендери, станува загрижен патриот.
Меѓутоа, од ДУИ обвинуваат дека на ВМРО-ДПМНЕ како политички субјект ѝ пречат Албанците на чело на институциите во државата.
„Овие медиумски изјави на ВМРО-ДПМНЕ се бледа копија на кампањата на СДСМ пред неколку години, со ист вокабулар и со иста цел. Спроведените проекти и конструктивниот пристап на кадрите на ДУИ ја демаскира политичката демагогија на ВМРО, која покажува знаци на неоснована нервоза од успесите на албанските кадри во водечките државни институции и политики“, се наведува во партиската реакција.
Од ДУИ порачуваат дека ВМРО-ДПМНЕ мора да научи и да ја прифати реалноста за рамноправното вклучување на Албанците и дека времињата на политики против, како што велат, Албанците, против соседите, против НАТО и ЕУ никогаш не може да се вратат во нашата земја.
„Жално е да се види како фрустрацијата на ВМРО ги води на маргините на социјалната толеранција. Неосновани обвинувања, лаги и измислени заговори не ѝ одговараат на една партија, која претендира да ја води оваа земја“, нагласуваат од партијата на Ахмети.
