Милорад Додик изјави дека никогаш нема да ги прифати наводите дека во Сребреница се случил геноцид и дека е подготвен да оди во затвор заради одбрана на тој став.
„Попрво би одел во затвор отколку да признаам нешто што не се случило, а тоа е наводниот геноцид во Сребреница. Таа приказна за наводниот геноцид стана актуелна во 2002 година, седум години по настанот. Одеднаш тоа се актуелизира и сега наводно сѐ се знае. Вистината е една – немаше геноцид“, рече српскиот член на претседателството на БиХ.
Тој посочи дека извештајот на Независната меѓународна комисија за Сребреница, предводена од Гидеон Грајф, сменил многу работи и дека вистината е една – дека немало геноцид.
„Независната меѓународна комисија одговори најдобро на сето тоа и навистина треба да се искористи затоа што е систематизирано од луѓе чие знаење, но и авторитет, е неспорно. Значи, во тој поглед, овој извештај многу менува“, рече Додик.
