Делчево, 17 март 2020 (МИА) – Општина Делчево во соработка со Центарот за јавно здравје Кочани – Епидемиолошка служба Делчево, ја реализираше мерката за дезинфекција на работните простории на јавните локални институции.
Активностите, како што информираа надлежните, се вршат согласно Препораките од Владата и Одлуката од Советот на Општина Делчево за заштита од пандемија на населението со коронавирус на територијата на општината.
– Во текот на денешниот ден ќе биде извршена дезинфекција на просториите на деветолетката „Ванчо Прке“, а вчера беше извршена дезинфекција на работните простории во Општина Делчево, како и Територијалнатапротивпожарна единица Делчево, мултифункционалната сала, просториите на ЈЛБ „Илинден“, каде е сместено Одделението за инспекциски надзор, како и подрачните училишта во селата Вирче, Град, Стамер, Тработивиште и Разловци, кои функционираат во рамките на ООУ „Св.Климент Охридски“, информираа надлежните.
Претходно, како што додадоа, е извршена дезинфекција на просториите на Општинската јавна установа Детска градинка „Весели цветови“, како и централното училиште „Св.Климент Охридски“.
Екипите од Епидемилошката служба во Делчево задутре ќе ги дезинфицираат Подрачните училишта во селата Габрово и Ѕвегор, како и просториите од гимназијата „М.М.Брицо”. вс/рп/
