Во 19 часот официјално заврши гласањето за парламентарните избори во Унгарија, а првите прелиминарни резултати се очекуваат подоцна во вечерните часови.
На изборите во Унгарија актуелниот премиер Виктор Орбан ќе се обиде да го освои четвртиот последователен мандат.
Орбан и неговата партија „Фидес“ на изборите ќе се соочат со здружена опозиција, првпат откако дојде на власт на изборите во 2010 година.
Според последното објавено истражување на јавното мислење, „Фидес“ на Орбан има тенка предност во однос на опозицискиот сојуз, објави претходно АП.
Коалицијата Обединети за Унгарија, која обединува шест опозициски партии со широк политички спектар – од либералите, преку центарот до десното крило, ги здружи силите за да ја собори десничарската Фидес.
Кандидат на опозицијата за премиер е Петер Марки-Жај, кој во моментов е градоначалник на Ходмезевашархел, град во јужна Унгарија.
Организацијата за безбедност и соработка во Европа (ОБСЕ) соопшти дека ќе испрати мисија за набљудување на изборите во Унгарија, вклучувајќи 18 долгорочни набљудувачи и 200 други на денот на изборите. Ова е втор пат ОБСЕ да го прави тоа во една од земјите на Европската унија, додава АП.
