После јавното објавување на стари службени е-маил адреси и лозинки на министерствата за финансии и економија, од страна на грчки хакери, Владата информира дека се работи за листа од неколку адреси и лозинки од поранешен систем за службени е-маил адреси на овие министерства.
„Дел од е-маил адресите не се во функција повеќе години, бидејќи нивните корисници не работат веќе во министерствата, а лозинките на сите објавени е-маил адреси се стари и се променети пред повеќе од седум години и во тие сандачиња не може да се пристапи преку објавените лозинки“, велат од Владата.
Оттаму додаваат дека и во двете министерства се обновени системите за службена електронска пошта и се поставени протоколи со сложени шифри за службените е-маил адреси, како и други протоколи за сајбер безбедност на системите со кои се намалува ризикот и веројатноста системот да биде компромитиран.
Од Владата посочуваат дека во моментов немаат докази дека системите за електронска пошта на министерствата се хакирани во скоро време, и ги испитуваат сите детали поврзани со овој случај.
Рекацијата на Владата следува откако на Твитер се појави листа на меилови и пасворди на вработени во Министерство за финансии и Министерство за економија, кои ги објави анонимен твитер профил наречен Powerful Greek Army („Силна грчка армија“).
“Macedonia’s”
Ministry OF Economy & Ministry OF Finance Hacked #PGA
Database LEAK: https://t.co/4xcyCtXtjO
(Includes all of the employees passwords & emails)— Powerful Greek Army (@PowerfulArmyGR) May 10, 2020
Од Владата појаснија дека константно работат на обнова и зајакнување на ИТ системите во институциите и ја изработи првата Национална стратегија и акциски план за сајбер безбедност.
