Струмица, 8 април 2020 (МИА) – Градоначалникот на Струмица Коста Јаневски, доцна синоќа се обрати до струмичани со, како што рече, најголема молба да ги почитуваат мерките за заштита од коронавирусот.
– Сликата по улиците, а посебно пред одредени институции ме загрижува како градоначалник, а пред се како лекар. Тоа што досега нема регистрирано случај на заболување од коронавирусот на територијата на општина Струмица, не ни дава за право да се однесуваме комотно и недисциплинирано. Само од нас зависи дали така ќе остане. Убеден сум дека наша заедничка желба е така да остане и затоа ве замолувам да се вразумиме и најсериозно да ги почитуваме мерките од надлежните институции, порача градоначалникот Јаневски.
Ги повика граѓаните да останат во нивните домови и дека ќе дојде време и за прошетки по парковите и улиците, а доколку треба да излезат и завршат некоја работа да држат соодветно растојание, да не се групираат и да ги почитуваат и другите мерки за лична заштита.
– Ги повикувам и институциите пред кои деновиве се забележани поголеми групи на граѓани, да покажат поголема одговорност со почитување на мерките за нивно работење во овие вонредни околности, додаде Јаневски.
На вчерашната средба со претставници на СВР-Струмица била разгледана актуелната состојба и било заклучено дека при вакво однесување на граѓаните е потребно поголемо полициско присуство на терен, иако нивните капацитети се ограничени.
На крајот струмичкиот градоначалник уште еднаш повика на поголема одговорност и сериозност за состојбата за да им се олесни на сите кои се грижат за здравјето. рт/мс/
