Повеќе од 1.200 пожарникари учествуваат во гаснењето на големиот шумски пожар во португалскиот природен парк „Сера да Естрела“, кој се разгоре само неколку дена откако беше ставен под контрола.
Силните ветрови ги попречуваат напорите на пожарникарите да го локализираат еден од 192-те пожари кои опустошија околу 92.000 хектари земја низ Португалија оваа година поради рекордно високите температури, пренесе АФП.
Пожарот повторно беснее во природниот парк, кој е под заштита на УНЕСКО, а веќе зафатил површина од околу 25.000 хектари.
Шефот на службата за цивилна заштита, Андре Фернандеш изјави дека ситуацијата е голем предизвик, иако „90 отсто од периметарот на пожарот сега е под контрола“.
Португалија го мина најтоплиот јули во последните 100 години, а шумските пожари се најголеми од 2017 година, кога загинаа околу 100 луѓе, пренесуваат светските агенции.