Скопје, 4 март 2020 (МИА) – Залудни се лагите и заканите на ВМРО – ДПМНЕ. Просторот покрај обиколницата во Стајковци, што долго време беше дива депонија и целосно запуштено место, го чистевме повеќе од пет пати и денес тоа е урбано уреден простор, изјави градоначалникот на Општина Гази Баба, Борис Георгиевски.
Како што изјави Георгиевски по извршениот увид во градежните активности за уредување на просторот во Стајковци, отпадот е расчистен и поставена е нова земја, како и осветлување и урбана опрема, а засадени се и 20 јавори.
– Искрено жалам што овој проект токму претседателот на Советот на општина Гази Баба, Тони Бојковски наместо да го поздрави, се обиде во негов стил насилно и со закани да го стопира, па дури и да исценира лажна приказна дека се создава депонија, со цел да претстави лоша слика за мене и моето работење, за манипулација на народот која би му донела некој ситен политички поен. Се обиде и да ги спречи лицата кои работеа на проектот, иако неговата надлежност, како претседател на Советот, не го дозволува тоа, истакна градоначалникот.
Додаде и дека остро го осудува однесувањето на Бојковски.
– Нема да дозволам мојот труд да се девалвира со лаги и манипулации, а освен тоа жителите можат многу лесно да проверат и сами, да се уверат дека овде депонија нема, туку напротив, имаме нов уреден простор кој сите треба да го чуваме, напомена Георгиевски. мч/сп/
