Во Русија, во изминатите 24 часа, потврдени се 14.057 нови случаи на коронавирус, што е скоро двојно повеќе отколку пред две недели.
Во исто време, во последните 24 часа починале 416 лица, пишува ТАСС.
Најголема концентрација на инфекција има во Санкт Петербург, а вкупниот број на заразени лица во Русија од почетокот на пандемијата е 5.264.047.
Градоначалникот на Москва, Сергеј Собјанин, вчера предупреди дека ситуацијата со коронавирусот е драматична и во руската престолнина.
Собјанин изјави дека во болниците има повеќе од 12.000 пациенти и дека бројот на новозаболени е на ниво на пиковите од претходните бранови на епидемијата.
Како што пренесува РТ, Москва во моментот е првиот град во светот со задолжителна вакцинација не само за здравствените работници туку и за вработени во други индустрии.
Вработените треба да ја примат првата доза вакцина до 15 јули, а втората до 15 август.
Ова првенствено се однесува на вработените во услужниот сектор, трговијата, угостителството, транспортот, здравството, домувањето и комуналните услуги, образованието и културата.
