Во Москва претепан блогер кој важи за политички противник на Путин

Рускиот опозициски блогер, Јегор Жуков, бил претепан синоќа во Москва, а, според информации од неговите соработници, напаѓачите успеале да избегаат.

Дваесет и двегодишниот Жуков, на кого му се судеше за екстремизам во 2019 година, бил нападнат во близина на неговата куќа и претепан, изјавија неговите соработници кои објавија фотографии од младиот човек, со модринки и раскрвавена уста.

Според истиот извор, Жуков бил нападнат од две лица кои потоа побегнале.

По големите протести на опозицијата во Москва во текот на минатата година, Жуков беше уапсен и обвинет за организирање масовни немири, по што граѓанското општество застана во негова одбрана.

Тој доби три години условна казна и забрането му е да води интернет страници и платформи, па активностите ги водат негови соработници.

Портпаролот на Кремљ, Дмитриј Песков соопшти дека полицијата го истражува нападот.