Дебар, 19 јуни 2020 (МИА) – Во последното деноноќие во Дебар потврден е уште еден случај со Ковид-19, со што бројката од почетокот на пандемијата се зголеми на 63.
Од вкупната бројка, 48 се внесени во списокот на оздравени, четворица починаа, активни на болеста се 11 лица, во самоизолација се 81 лице, дел од нив наши државјани кои се вратиле од странство и подлежат на задолжителна изолација.
Коронавирусот во Дебар се врати по педесет дена, кога на 5-ти јуни беше дијагностициран кај жена од селото Долно Косоврасти а два дена потоа и кај маж од Дебар, на 12 јуни беа регистрирани три, на14 јуни пет и на 17 јуни и денес, по еден нов случај.
Како што информираше на денешната прес конференција градоначалникот Хекуран Дука резултати се очекуваат од 40 тестови.
Во меѓувреме во рамки на договорените мерки на општинскиот Оперативен штаб почна повторна дезинфекција на улиците во градот а според планираната динамика следните денови ќе продолжи и во селските населени места.
Оваа активност ја извршуваат вработените во Јавното комунално претпријатие „Стандард“ и на Територијалната противпожарна единица.
Најавено е повторно да бидат поставени апарати за дезинфекција на возила кои влегуваат во Дебар, на патот од Струга кај ХЕ „Шпилје“ и од Маврово кај Мелнички Мост, како што беше претходно. вт/ир
