Виница, 13 февруари 2019 (МИА) – Локалната самоуправа на Виница почна со изработка на стратегија за развој на туризмот за периодот 2020-2024 година, а за што поддршка обезбеди и од Министерството за економија.
Во рамки на активностите околу подготовката и прибирањето на неопходните податоци се одржа првата работилница на која своите ставови, забелешки, сугестии и идеи ги изнесоа претставници од општинската администрација, од невладиниот и од бизнис секторот. Исто така, учествуваа и професори од штипскиот Факултет за туризам и бизнис логистика и членови на здружението „Туристика“ од Скопје.
-Виница како претежно рурална средина има огромен потенцијал, а изработката на стратешкиот документ не е поврзан само со општината, туку и со целиот регион во кој туризмот има значајно место. Визијата за туристичкиот развој, што произлезе од работилницата, е да се спои културното наследство со современите тенденции. Притоа, развојот на квалитетни човечки и институционални капацитети, развојот на туристичката инфраструктура и проширувањето на туристичката понуда, промоцијата и заштитата на постојните ресурси се трите основни приоритети за изработка на стратегијата, истакна Оливер Филипоски, професор на Факултетот за туризам и бизнис логистика при Универзитетот „Гоце Делчев“ од Штип.
Во дебатата на работилницата беа претставени слабостите и позитивните можности за секој од приоритетите, што на крајот како заклучоци ќе бидат сублимирани во стратешкиот документ.
За изработка на стратегијата за развој на туризмот, Општина Виница вложува околу 300 илјади денари, а според склучениот договор со здружението „Туристика“, во печатена и електронска форма треба да биде готова до крајот на април. та/вј/
