Талибанците кон крајот на јули егзекутирале познат авганистански комичар, кој ги исмевал на „ТикТок“.
Британски „Дејли Мејл“ објави видео на кое се гледа Назар Мухамед, попознат како Каш Зван, во автомобил со вооружени исламистички милитанти. Тој е познат по своите снимки на „ТикТок“ во кои ги исмева талибанците преку песна и танц.
Во видеото на кое се прикажани неговите последни моменти, комичарот се пошегува на сметка на талибанците, поради што милитант во автомобилот му удри неколку шлаканици.
Според извештаите, по погубувањето се појавиле фотографии на кои се гледа како комичарот стои покрај дрво, потоа како лежи на земја со пресечен врат.
Талибанците прво ги демантираа информациите дека се вмешани во убиството на комичарот, иако признаа дека двајцата мажи на снимката биле членови на нивната група. Тие рекоа дека комичарот е уапсен, додавајќи дека ќе му суди талибанскиот суд.
Според талибанците, Назар бил вмешан во мачење и убивање на нивни членови. Комичарот претходно работел за авганистанската полиција, а потоа станал познат по шегите и духовитите песни.
