Со порака до Европската Унија дека нема суверено право да наметнува ултиматуми за прифаќање на нешто што ќе значи промена на идентитетот, почна протестот пред Собранието против францускиот предлог кој за еден час ќе го разгледуваат пратениците.
„ Си ја сакам земјата и дојдов да испратам неколку пораки. Првата е народна поговорка која вели ‘немој да одиш пред мене зашто не можам да те стигнам, оди покрај мене за да ми бидеш пријател’. Ќе ве замолам да бидете до мене оти ако ја нема Македонија ќе не нема и нас. Ние граѓаните имаме добар соживот и ги почитуваме соседите, но не се гради добрососедство со сила и ултиматуми. И порака за кодошите во Собранието – не ве жалам вас, ги жалам вашите деца кои ќе бидат обележани. Порака и до Европејциве кои мислат дека имаат суверено право на светот. Ние колку сме толку сме, токму сме“, порача граѓанин кој го одржа воведниот говор на протестот.
Пред Собранието се скандира „никогаш северна, само Македонија“, ечат свирчиња и труби и се веат знамиња. Од сите страни се собираат демонстранти и нивниот број пред Собранието постојано се зголемува.
Орце Костов