Четврт ден по ред насилни протести во Белград, но и во повеќе градови во Србија, наспроти забраната за собирања на повеќе од 10 луѓе на јавни места, пренесуваат српските медиуми.
Незадоволни од политичката и епидемиолошката ситуација во земјсата, граѓаните излегоа на улиците во Белград, Нови Сад, Ваљево, Ниш, Лесковац, Пирот, Врање.
По 20.30 часот избија судири меѓу десничарите, припадниците на „Левијатан“ и „Образ“. Демонстрантите фрлаат камења кон полицијата, која пак се обиде со солзавец да ги растера.
Демонстрантите кршат прозори и врати на Собранието, ја пробиле заштитната ограда и се качиле на собраниските скали, а потоа се обиделе да упаднат во зградата на Народното собрание. Запалиле и факли. Пристигнуваат и припадници на жандрмеријата.
Како што пренесуваат српските медиуми, демонстрант со маска пред Собранието нападнал новинар на Н1.
Според информациите, уапсен е демонстрант поради сомневање дека на протестот пред Собраниската зграда, по караница со нож прободел 32-годишен маж.
