Најмалку 22 лица загинаа во катастрофалните поплави во американската сојузна држава Тенеси во саботата, додека спасувачките тимови трагаат по уште десетици луѓе кои се водат како исчезнати.
Поплавите во саботата во руралните области уништија патишта, телефонски столбови, оставајќи цели семејства да се прашуваат дали нивните сакани преживеале невидени поплави, пренесува агенцијата АП.
Во саботата падна до 43 сантиметри дожд во округот Хамфрис, со што беше соборен рекордот на Тенеси за еднодневни врнежи за повеќе од осум сантиметри, објави Националната метеоролошка служба.
Од невремето има остатоци од уништени автомобили, демолирани куќи и други објекти насекаде во областа.
Фејсбук страницата на канцеларијата на шерифот во округот Хамфрис е исполнета со пораки од луѓе кои бараат исчезнати пријатели и семејство.
Неодамнешните научни истражувања потврдија дека обилните врнежи ќе станат почести поради климатските промени предизвикани од човекот.
