Јапонскиот премиер Фумио Кишида се сретна со американскиот државен секретар Ентони Блинкен, кој изрази сочувство во врска со убиството на Шинзо Абе.
Блинкен, кој беше во Индонезија на самитот на министрите за надворешни работи на Групата 20 (Г20) кога беше убиен Абе, на Кишида му предаде писмо од претседателот Џозеф Бајден до семејството на Абе, објави АП.
„Сакаме само да знаат дека ја чувствуваме загубата длабоко и на лично ниво“, му кажал Блинкен на Кишида.
Како што изјавил Блинкен, тој е таму, бидејќи САД и Јапонија се повеќе од сојузници, тие се пријатели.
Тој кажал дека Абе „направил повеќе од кој било за да ги подигне односите меѓу САД и Јапонија на ново ниво“.
Блинкен беше највисокиот американски функционер што ја посети Јапонија по смртта на Абе, според американската агенција.
Погребот на јапонскиот политички лидер со најдолг стаж се очекува во наредните денови, пишуваат агенциите.