Гејтс е сопственик на 100.000 хектари обработливо земјиште во дури 18 држави.
Со неодамнешната најнова аквизиција, тој е новиот најголем приватен сопственик на земјоделско земјиште во Америка. Најголемите површини земја има во Луизијана, а потоа следуваат Арканзас и Небраска.
На многумина им е чудно што човекот што стои зад една од најголемите технолошки компании во светот – „Мајкрософт“ – е и најголемиот сопственик на земјиште.
Но, Бил и Мелинда Гејтс објавија во 2008 година дека ќе дадат над 300 милиони долари за промоција на мали земјоделци во Африка и Азија и тоа оние кои се занимаваат со одржливо земјоделство и имаат високи приноси.
Нивната добротворно-инвестициска компанија инвестираше и во развој и ширење на „суперкултурите“ отпорни на климатските промени и во млечните крави кои произведуваат големи количини млеко.
Сè уште не е познато дали тој ќе ја користи целата земја, или за што ќе ја користи. Но, многумина се надеваат дека ќе се користи во согласност со вредностите на нивната фондација за одржливо и еколошко производство и слични цели.
Бил Гејтс е можеби најголемиот приватен сопственик на обработливо земјиште, но тој е далеку од број еден кога станува збор за сопственоста на земјиштето воопшто. На тронот е Џин Малон, извршен директор на „Либерти медија“ и акционер во големите медиумски корпорации, кој поседува 2,2 милиони хектари ранчови и шуми.
На трето место е Тед Тарнер, основачот на „Си-ен-ен“, со два милиони хектари земја и ранчови во осум американски држави.
Дури и извршниот директор на „Амазон“, Џеф Безос, инвестира во земја. Тој поседува 420.000 хектари земја, претежно во западен Тексас.
