Претседателот на САД, Џо Бајден, потпиша пакет извршни наредби за борба против климатските промени, меѓу кои е паузирање на нови закупи на нафта и гас на федерално земјиште и намалување на субвенциите за фосилни горива.
Наредбите што ги потпиша ги насочуваат насоките на агендата за климатски промени и претставуваат пресврт во политиката на неговиот претходник Доналд Трамп, кој се обиде да го зголеми производството на нафта, гас и јаглен со укинување на прописите и олеснување на мерките за заштита на животната средина, наведува „Ројтерс“.
„Мислам дека чекавме премногу долго за да се справиме со климатската криза“, рече Бајден на церемонијата во Белата куќа, истакнувајќи дека заканите кои се појавуваат од засилените бури, пожари и суши со кои се соочуваат САД се поврзани со климатските промени.
Тој рече дека со градење модерна и еластична климатска инфраструктура и иднина на чиста енергија ќе се отворат милиони добро платени работни места за САД.
Плановите на Бајден беа поздравени од меѓународните партнери и активистите за клима, но најголемите нафтени компании предупредуваат дека овие потези ќе ги чинат САД милиони работни места и приходи од милијарди долари во време кога американската економија е веќе погодена од пандемијата на коронавирус.
