Во 2018 и 2019 отворивме тема на која лично имам зборувано многу пати, за улогата на семејството Заеви, конкретно Вице Заев, СВ Инвест, Стојан Чифлигароски, Васко Ковачевски и многу други, во криминалот во РЕК Битола и перењето на милиони евра, напиша во објава на „Фејсбук“, портпаролот на ВМРО-ДПМНЕ, Димче Арсовски.
Тој додава дека јавноста е сведок на криминал, како што вели, до гуша на фамилијата Заеви, каде што 2 случаја кои денес биле објавени се клучни.
„Најпрвин во пријавата во МВР, се гледа дека Вице Заев преку своите битолско-струмички паљури барал рекет од 250.000 евра и потоа ја избркал фирмата која не му била по желба од РЕК Битола на сила и ѝ нанел штета од 500.000 евра. Класичен рекет за во затвор, каде што 5-6 луѓе треба одма да одат во затвор, на чело до Вице“, смета Арсовски.
Според него, второто криминално дело е менувањето и фалсификувањето на изјавата на оштетените, каде што некој, како што посочува Арсовски, се обидел да ја скрие пријавата за Вице, кој што барал 250.000 евра.
„Значи да сумираме, за овие 2 дела, следниве луѓе треба да излезат пред лицето на правдата и тоа веднаш: Вице Заев, Васко Ковачевски, Стојан Чифлигароски, Лазе Велковски, Оливер Спасовски, Вилма Русковска и Љубомир Јовевски“, пишува во објавата портпаролот на опозициската партија.
