Како човек што 20 години е дел од бизнис секторот знам точно со што се соочувате и каде е потребно да се влијае за да се овозможи одржливост и раст на локалните бизниси, истакна кандидатката за градоначалник на Град Скопје, Данела Арсовска на денешната средба со Неби Хоџа, претседател и Дриљон Исени, извршен директор на Стопанската комора на северо-западна Македонија.
Арсовска додаде дека градските служби треба да бидат во функција на бизнисите, исто како што градоначалникот може и треба да се вклучи во поттикнување и обезбедување клима и услови за работа и развој.
„Работењето заедно и меѓусебната помош, неминовно ќе доведе до севкупен економски развој. Општината е должна како на граѓаните така и на бизнисите да им обезбеди брзи и транспарентни служби, некорумпирана администрација, функционална инфраструктура, нешто што во целиот овој период недостасува и е сериозен проблем и пречка за компаниите, а тоа го знам од секојдневното искуство и од реакциите на многу наши членка“, истакна Арсовска на состанокот.
Претставниците на Стопанската комора на северо-западна Македонија, посочија дека меѓусебното разбирање и поддршката на бизнис заедницата, ќе доведе до континуиран раст на компаниите, што е заедничка цел.
Пред Арсовска тие ја претставија платформата за локален економски развој, каде се наведени точки на кои е потребно да се работи, со цел да се создадат услови за непречена работа и развој на бизнис заедницата.
