Како претставник на Северна Македонија во конституенците на MМФ, Светската банка и ЕБОР, Холандија и натаму ќе обезбедува силна поддршка за земјата и за Народната банка во комуникацијата и соработката со меѓународните институции, што е исклучително важно во овие тешки времиња. Одлуките на Народната банка донесени во изминатата година се добредојдени во овој контекст. Потребно е состојбата и понатаму да се следи и соодветно да им се одговори на предизвиците, особено во однос на фискалната дисциплина и управувањето со јавниот долг. При справување со предизвиците, важна е поддршката на меѓународните институции при што ние остануваме ваши партнери во остварувањето на стратешките цели. Од клучно значење е да се продолжи со спроведувањето на структурните реформи во економијата на Северна Македонија. Ова го кажа амбасадорот на Кралството Холандија, Дирк Јан Коп, на средбата со гувернерката на Народната банка, Анита Ангеловска-Бежоска.
Амбасадорот и гувернерката разговараа за актуелните состојби во економијата и особено за кондицијата на финансискиот сектор. Притоа, беше посочено и на предизвиците за полесно надминување на кризата и на придонесот на кредитната поддршка за реалниот сектор, за којашто уште еднаш се оцени дека ќе биде исклучително значаен фактор и во претстојниот период. Во тој контекст се разговараше и за одлуките на Народната банка коишто се однесуваат на натамошно јакнење на системот, при што беше нагласено дека таквата внимателност е особено важна за одржувањето на кредибилитетот и транспарентноста во работењето на Народната банка, како основа за остварување на нејзината улога во одржувањето на макроекономската стабилност.
Двајцата соговорници споделуваа мислења и за подготвеноста на Народната банка за преземање соодветни активности и носење соодветни одлуки, во прилог на макроекономската стабилност, како и за поддршка на граѓаните и компаниите, велат од НБРМ.
Гувернерката Ангеловска-Бежоска искажала задоволство што и во текот на корона-кризата, соработката со Банката на Холандија е интензивна и се одвива на исклучително експертско ниво.
Амбасадорот Коп и гувернерката Ангеловска-Бежоска го споделија ставот дека за македонската економија се клучни натамошни структурни реформи, коишто на долг рок ќе го зголемат потенцијалот за раст, од што зависи и одржувањето на позитивните согледувања на меѓународните инвеститори.
