Адвокатите на поранешниот италијански премиер Силвио Берлускони поднесоа тужба против една од „неговите девојки“, Џована Ригато, за обид за изнуда.
Ригато од Берлускони побарала прво 500.000, а потоа и еден милион евра, што според адвокатот е изнуда, пишува „Фато Котиодиано“. Девојката е еден од сведоците во судскиот спор против Берлускони, таканаречен „случај Руби“, а според медиумите, таа не е единствената што примила или побарала пари во замена за нејзиното молчење.
Имено, поранешниот премиер и лидер на партијата „Форца Италија“ се гони под обвинение дека имал сексуални односи со малолетничка по име Руби. Тоа е прекарот на Мароканката Карима ел Маруг, која заедно со други девојки учествуваше во таканаречените „елегантни вечери“ во вилата на Берлускони, каде што, според сведочењето, имало проституција, макро и слично.
Ригато, која учествувала на тие собири, тврди дека не изнудува пари, туку бара отштета за сè што претрпела откако била ставена на списокот со сведоци во 2010 година, а потоа обвинета во „судењето Руби“.
Таа тврди дека Берлускони и ветил помош, дури и работа на новинар на една од неговите телевизии и не гледа ништо лошо во тоа бидејќи, според нејзините зборови, „Берлускони е добра и дарежлива личност, кој им помага на оние кои имаат потреба“.
Судењето „Руби“ трае веќе неколку години, а во последно време, сослушувањето се откажуваше неколку пати, бидејќи Берлускони беше во болница еден ден пред судењето под изговор дека ќе изврши здравствени прегледи, или дека не се чувствува добро.
